Alp- und Heimatsägu fär Simpilu und  Zwischpäärgu       

    (Sprechgesangliche Litanei / im Duett)

 

    Normaldruck: Sänger 1  /   Kursivdruck: Sänger 2  /  Fettdruck:  Sänger 1 + 2 gemeinsam

 

Oo loobät und priisät  –  Du Driifaltigu Herrgott

Du Vattär, du Soon  –  und du Heiligu Geischt

Iischu Herrgott im Himmil  –  in Macht und Herrlichgçheit

Denu bättä wiär á  –   in alli Eewigçheit

Äär phiätä und gsägnä  –  mit schiinär Hand

Iischi Heimat und Alpä  –  und d Liit und ds Land

 

Aawe, Aawe Marija  –  Brigriäzu well wär Di Marija

Dui bischt volli Gnaad  –  und där Herrgott ischt mit Diär

Dui bischt gigsäggnuti  –  unnär dum Wiibuvolch

Und gigsäggnuti ischt d Frucht  –  iischärs Jesusçhind

 

Heiligi Marija  –  Muätärgottes

Bätt fär iisch Sindär  –  allpott  –  und we wär schtäärbu tiä

 

Heiligä Joosef  –  Dui Schutzpatroo

Nimm schisch an Diini Hand  –  uf där Reis ins gilobut Land

 

Oo phiätisch där Herrgott –  und där Zant Jaakob und d Anna   1, 2, 3, 4)

Wiär bättä

  fär d Liit uf dän Alpju  –  fär di Giteilschaft und di Gnossuschaft

 

Oo phiätisch där Herrgott  –  und där Zant Antooni und där Wendoli

  fär di Puiru und d Hirta  –  und fär ds Vee und ds ganz Gizuidul

 

Oo phiätisch där Herrgott  –  und där Heilig Franzischggus und di Klaara

  fär d Mattä und ds Uäwand  –  und fär mälchs Chruit und Meijä

  fär di Bäärga und di Tschuggä  –  und fär ds Wild und fär d Faggsä

 

Oo phiätisch där Herrgott  –  und där Zamichlois va Myra

  Megäsch iisch doch biwaaru  –  vor Pschwaart und allä Gfaaru

  vor Lowwinä und Hagul  –  vor Rufinä und Wiäggisch

  vor Dirri und vor Waaldbrand  –  vor Schteischlag und Blitzschlag

 

Oo phiätisch där Herrgott  –  und där Zan Gotthird und Zam Markus

Wiär bättä

  fär di Pfarijä und di Gmeindä  –   fär di Burgär und di Zuägizognu

 

Oo phiätisch där Herrgott  –  und där Zant Jodär und Zam Merrätz

  fär ds Wallis und d Walsär  –  und du schtandhaftu Gloibu

 

Oo phiätisch där Herrgott  – und där Heilig Bruädär Klois vam Fliäli

  fär ds Vattärland und d Heimat  –  fär di Gsellschaft und d Wirtschaft

  schii sellä nisch biwaaru  –  vor Chriäg, Noot und Plaagä

 

Oo phiätisch där Herrgott  –  und där Heilig Mattee und Krischtoffoorus

  fär d Fruschíngini und d Reisundu  –  und di Propóschggini und d Schandaarmu

 

Oo phiätisch där Herrgott  –  und där Äärzengil Michul

  vor Abärgloibu  –  vor dum Ggapischtúrni und vor Chrangçheit

  vor Tiifla und Boozna   –  dasch nisch niit çhennä blaagu

 

Oo phiätisch där Herrgott  –  und Zant Johánn, där Aposchtul

Wiär bättä

  in där Oicharischtiifiir  –  fär d Neechschtuliäbi

                     fär d Neechschtuliäbi

 

Und geid allds chrumm und lätz  –  in Gotts liäbu Namu

Und geid allds chrumm und lätz  –  in Gotts liäbu Namu

 

Angscht, Plaag, Noot und Tood   –  sind in ds Herrgottsch Hand

Angscht, Plaag, Noot und Tood   –  sind in ds Herrgottsch Hand

 

Oo loobät und priisät  –  Du Driifaltigu Herrgott

Du Vattär, du Soon  –  und du Heiligu Geischt

Iischu Herrgott im Himmil  –  in Macht und Herrlichgçheit

denu bättä wiär á  –  allpot und in Eewigçheit

 

Schiinä Sägu ischt mächtig   –   wiär sii in schiinär Hand

Schiinä Sägu ischt mächtig   –   wiär sii in schiinär Hand

 

Amen  –  Amen  – Amen

 

 

Varianten je nach Talabschnitt, Geteilschaft oder Alpgebiet:

 

1)  für Alpjen: siehe oben!

 

2)  für Bergalpe und Nideralpe: 

Oo phiätisch där Herrgott –  und där Zant Jaakob und Zam Bernhard

Wiär bättä

  fär d Liit ufum Bäärg hiä  –  fär di Giteilu und oi d Fremdu 

 

3)  für Walderoberg, Oberes Drittel und Rossboden: 

Oo phiätisch där Herrgott –  und där Zant Johánn an där Eggu

Wiär bättä

  fär d Hiändru und d Ändru  –  im Obru Drittul

 

4)  für Zwischbergen:

Oo phiätisch där Herrgott –  und där Zant Johánn uf dum Boord hiä

Wiär bättä

  fär d Liit in Zwischpäärgu  –  und oi alli andru

 

 

* Worterklärungen:

     Gizuidul, Kleinvieh

     Faggsä,  Borstengras

     Fruschingini,  Schmuggler

     Proposchggini,  Grenzwächter

     Schandaarmu,  Polizeibeamte

     Pschwaart, Plage, Last

     Zant Jodär, Sankt Theodul