Vam Schwaarzu Tood

 

Der Schwarze Tod, wie die Pest auch genannt wurde, wütete im Wallis dermassen, dass die Bevölkerung mancher Walliserdörfer stark dezimiert wurde, manche Weiler wurden sogar entvölkert. Wer krank wurde, dem wuchsen schwarze Eiterbeulen an Hals, Achseln und Leisten. Die meisten Erkrankten starben nach wenigen Tagen. 

 

 

Där Schwaarz Tood im Doorf

 

Där Schwaarz Tood sellä im Deerffji schiinds umaal usoo firchtärli gwiätut hä, das mu zweenig Liit hei çhennu uifbiätu fär di Tootu uf du Friithof z träägu. Darfär heisch van där Gmei uis väroortnut: Jedä Íwonär, wa chrank und in där Neeçhi vam Tood sii, mièssä no sälbu uf du Friithof gaa fär daa z schtäärbu.

Un andri Zelluta phoiptut, dass viär pschtimmti Liichuntregja als Zallnisch jedäs Maal ds unnär Lillachu va där Liich hei pärchú. Wa mu dii alli hei ufusannärs gschpreitut, hei das u Heeji van umu Chlaaftär ggä, usoo hoochs wiä us gwaggsus Mandji ischt. Und um bessri Chuä hei mu schiinds am ğliichun Tag sibumaal çhennu wiitär värerpu, usoo sii dii Liit gschtoorbu.  -  Jetz: ob Simpilu duozumaal un Groosschtadt  isch gsii old ob d Liit an där Ludji ärschtickt sind, das pliibt appa us Gheimnis.

 

Quellen: Blätter aus der Walliser Geschichte, Nachlass von Pfarrer F. Joller, hrsg. Imesch Dionys (1901), S. 447; Volkserzählungen aus dem Oberwallis, Guntern Josef (1978), S. 328, 329.

 

 

Där Schwaarz Tood uf dän Alpju

 

In äru aaltu Zellutu heissuts, dass uf dän Alpju där Schwaarz Tood usoo firchtärli gwiätut hei, dass alli Liit, bis uf zwee Schweschträ sii uisgschtoorbu. Dii sii schich ins Waliggufär ob dä Eerblattu in u Hili ga värschtecku und sii usoo ggärettuti chu. Eini va denä beedo hei därnaa schiinds du schlimm Pera va Rudu gheraatu.

 

Quelle: Blätter aus der Walliser Geschichte, Nachlass von Pfarrer F. Joller, hrsg. Imesch Dionys (1901), S. 448.