Iischärs Deerffji zwischu Ziit und Eewigçheit

Sid aaltä Ziitu heissuts, dass iischärs Deerffji nid immär daa gschtannu sii, waas hiitu schteit. Ds eerscht Deerffji soll mitsch im Chascht^ulbäärg, in där Bäruchummu gschtannu sii. Hiitu ischt deer Schtaaf^ul fascht ganz übärwaaldutä und mu gseed daa numu no u schuppu Hóschtett und zärfallni Muirä in där ganzu Wildnis zärzeetruti. Eppis wiitär obuna gits oi no d Heidimuira z gsee. Viliichtär hets dii Zelluta déschitwillu ggä, wil där Hoiptwägg ubär du Bäärg duozumaal nit där di Gondoschlucht ischt ggangu. Deer sii schiinds durch du Chascht^ulbäärg und d Alpjä ggangu, also çhennti am Chascht^ulbäärg oi us chleis Deerffji gschtannu sii. Äs gid oi um Meinig, dass där reemisch Fääldherr Sempronius mit schiinär groossu Armee anno hunnärtsägschuniinzig vor Krischtus als Eerschtä ubär du Bäärg sii gizogu und dármig dum Pass schiinu hiitig Namu hei ggä. - Welts sus cha gloibu, soll sus gloibu!

In äru andru Zelluta heissuts, dass där Eewig Jud z Simpilu schoo zweimaal sii värbii chu. Weⁿ är ds drittuscht Maal chumä, de maçhä är ufum Ägärbièl ob dum Doorf Barlogga – daa wa jetzu ds grooss Chriiz schteit - und sägä z schiinum Bigleitär: Daa unna ischt umaal us Deerffji gschtannu.

Und äs gid no un dritti Tschudluta: Daa heissuts, dass di ganz Gägund us Tagsch numu me u Schaafalpa sii und drii Jegär träffä schich obuna ufum Ägärbièl und sägä unändrä: Daa unnuna, wa jetz di ganzu Hóschtett sind, daa ischt umaal us Deerffji gschtannu. – Janú, wädri Zelluta soll waar sii, das chunt de no uis!

Quellen: Blätter aus der Walliser Geschichte, Nachlass von Pfarrer F. Joller, hrsg. Imesch Dionys (1901), S. 446; Der Simplon, zur Geschichte des Passes und des Dorfes, Arnold Peter (1947), S. 21; Aus Simplons alten Tagen, Zenklusen Ernst (1965), S. 16; Volkserzählungen aus dem Oberwallis, Guntern Josef (1978), S. 70.